Spread the love

ચેન્નાઈ, દિલ્હી, જયપુર, હૈદરાબાદ… જેવા મોટા શહેરોમાં ‘ફ્યુનરલ સર્વિસ સેન્ટર’ (FSC) કોરપોરેટ કંપનીની માફક શરુ થઈ છે. આવા એક ગૃહની ઇન્ક્વાયરી ઓફિસેથી જાણવા મળેલી વિગતો…

સ્મશાનમાં સ્લોટ બુકિંગ :
જેવા આપ લાભાર્થીને લઈ પહોંચો નો વેઈટિંગ. અનામત ક્વોટા ફીક્સ્ડ. પારંપરિક શાસ્ત્રીય વિધિ માટે બ્રાહ્મણ. પંડિતની સેવા ઉપલબ્ધ.

સગા-વહાલાં : સાહેબ, બહાર બોર્ડ પર ગોલ્ડ પેકેજ અને બેઝીક પેકેજ એમ લખેલું જ છે. એ બંનેમાં શું તફાવત છે !

મેનેજર : સાહેબ બેઝીક કરતા ગોલ્ડ પેકેજનો દર દોઢા… થી બમણો હોય છે. એ ઉપરાંત બીજી ખાસ વધારાની સવલતો અપાય છે.

સગા-વહાલાં : બેઝીકમાં કઈ કઈ વસ્તુ… વિધિ થાય ?

મેનેજર : એમાં તમને ભઠ્ઠીનો ઓપશન મળે. લાકડાની ચિતા જ મળે. ત્રણથી ચાર કલાક સમય લે. ગરમી

ધૂમાડો વધુ થાય. ઘી ચાલુ વપરાય. પંડિત વિધિવાળો એક જ હોય (એની મદદમાં તમારામાંથી કોઈએ હાજર રહેવું પડે.) બેસણાની જાહેરખબરને બદલે અવસાન નોંધ દરેક છાપામાં મોકલી આપીએ. શબને હોસ્પિટલમાંથી લાવતા વાર લાગે તો કલાકને હિસાબે અલગ ચાર્જ…

સગા-વહાલાં : ગોલ્ડ પેકેજ છે તો બહુ મોંઘુ. આ ભાવ સાંભળીને તો કદાચ મડદું ય બેઠું થઈને ના પાડી અમને ધમકાવે. છતાંય એની સ્પેશ્યાલીટી શું છે ?

મેનેજર : સાહેબ, હું તો તમને ગોલ્ડ પેકેજની જ ભલામણ કરું. જીવ્યો ભલે ઠાઠથી ના હોય મોતનો તો મલાજો રાખવો પડે ને !

*એક તો ઇલેક્ટ્રીક ભઠ્ઠી અને એસી હોલમાં બધાની બેઠક. કલાકમાં નિકાલ. તમને અને ભઠ્ઠી લાભાર્થી માટે કંર્ફટેબલ.
*દર પા કલાકે ઠંડી ચિલ્ડ બીસલેરી વોટર ફ્રી.
*ભઠ્ઠીમાં ઘી ગિરનારી ગાયનું શુદ્ધ ઘી. (લાભાર્થીને જરાય પીડા ના થાય. વળી પાછું એન્ટીસેપ્ટિક)
*બેસણાની જાહેરાત મુખ્ય અખબારમાં
*ફૂલો, નાળિયેર, ધાણા ચાદર બધું એક્સપોર્ટ ક્વોલિટીનું
*અરે ! ડાઘુઓ ઓછા પડતા હોય તો અમારા સ્ટાફમાંથી ય ચોક્કસ રકમમાં ઉભા રહેશે…
* અને સાહેબ… આ ખર્ચા માટે લોનની પણ વ્યવસ્થા !

તા.ક. મરણ પછીના અસ્થીવિસર્જનનો ચાર્જ આમાં સામેલ નથી. એ અલગથી ચૂકવવા પડશે. વિધિ માટેનાં સાંસ્કૃતિક પંડિત (સાંસ્કૃતિક પંડિત યજમાન પાસેથી દક્ષિણા લેશે ! ફી નહીં !) અને તેમની ટીમના અગાઉથી ચૂકવવા પડશે.

હાટમાં ચાલો, વાટમાં ચાલો
ઘાટમાં ચાલો ભેળાં
હાડકાં રહ્યા બાકી
એના ભરો બજારે મેળાં
‘છૂટવાની’ આ વેળાં
આ લોકોને ઘી-કેળાં !